શ્રી વિજયભાઈ પુરોહિત (પંડિતજી)

શ્રી વિજયભાઈ પંડિતજી એક બહુવિધ આયામ ધરાવતું વ્યક્તિત્વ છે. જ્યોતિષ, કર્મકાંડ, વાસ્તુ અને જન્માક્ષરના ક્ષેત્રમાં એમનું નામ આદરથી લેવાય છે. ખાનદાની સંસ્કારી અને અધ્યાત્મિક કુટુંબમાં જન્મેલા પંડિતજી પાંચ ભાઈ-બેનોના પરિવારમાં ચોથું સંતાન છે. તેમના પિતાજી શાળામાં પ્રિન્સિપાલ હતા. તેમના માતુશ્રી મા જગદંબાના અનન્ય ભક્ત હતા.

શાળાના દિવસોથી જ પંડિતજીને જ્યોતિષ શાસ્ત્રમાં રસ હતો. શાળાકીય અભ્યાસક્રમ પછી તેમણે એમની રુચિને સંતોષવા જ્યોતિષનો ગહન અભ્યાસ કરવાનું નક્કી કર્યું. તેમણે ક્રમશઃ ૧૯૮૫માં જ્યોતિષ વિશારદ, ૧૯૮૮માં જ્યોતિષ શાસ્ત્રી અને ૧૯૯૦ માં જ્યોતિષ આચાર્યની પદવી પ્રાપ્ત કરી. તેમને અભ્યાસકીય ઉપલબ્ધિ માટે મહારાજા સયાજીરાવ યુનિવર્સિટી તરફથી બે વાર સુવર્ણચંદ્રક એનાયત થયા છે. એ ઉપરાંત તેમણે કાશીની સંપૂર્ણાનંદ વિશ્વ વિદ્યાલયની જ્યોતિષની પરીક્ષા તથા ગુજરાત સરકારના જ્યોતિષ વિભાગ તરફથી લેવામાં આવતી શ્રાવણ માસ દક્ષિણા પરીક્ષા પણ પાસ કરી. ત્યારબાદ તેમણે મહારાજા સયાજીરાવ યુનિવર્સિટીમાં પાંચ વરસ સુધી પ્રાધ્યાપક તરીકે સેવા આપી, જે દરમ્યાન તેમણે છાત્રોનો અનહદ પ્રેમ અને આદર પ્રાપ્ત કર્યો હતો.

છેલ્લા ત્રીસ વરસથી તેઓ જ્યોતિષ, કર્મકાંડ, જન્માક્ષર અને વાસ્તુ વિષયક માર્ગદર્શન આપી રહ્યા છે. દેશવિદેશમાં એમનો બહોળો પ્રસંશક વર્ગ છે. શુદ્ધ સંસ્કૃત ઉચ્ચારો, વિધિ કરતી વખતે યજમાન અને ઉપસ્થિત શ્રોતાઓને અર્થ સમજાવવાનો સંનિષ્ઠ પ્રયાસ, તથા એમની ભાવપૂર્ણ પૂજાવિધિને કારણે યજમાનો એમની પાસેથી જ વિધિ કરાવવાનો આગ્રહ રાખે છે. પંડિતજીના સાન્નિધ્યમાં આવવું એ જીવનનો અણમોલ લ્હાવો છે.