ષોડશ સંસ્કારો

અમારે ત્યાં શાસ્ત્રોક્ત-વેદોક્ત પદ્ધતિ પ્રમાણે શ્રદ્ધા અને શાંતિપૂર્વક સાત્વિક નિર્વ્યસની બ્રાહ્મણ દ્વારા સંપૂર્ણ ધાર્મિક કર્મકાંડ, ષોડશ સંસ્કારો જેવા કે ગર્ભાધાન, પુંસંવન, સીમન્ત, જાતકર્મ, નામકરણ, નિષ્ક્રમણ, અન્નપ્રાશન, ચૌલ, ઉપનયન, વેદવ્રત ચતુષ્ઠય (ઋગ્વેદ, યજુર્વેદ, સામવેદ, અથર્વવેદ) કેશાંત, સમાવર્તન, વિવાહ સંસ્કાર (અશ્વત્થ વિવાહ, કુંભ વિવાહ, વિષ્ણુ વિવાહ, અર્કવિવાહ ) કરાવવામાં આવે છે.

વિભિન્ન દેવયાગો અને પ્રાણપ્રતિષ્ઠા

અમારે ત્યાં પંચાયતન દેવયાગ, ગણેશયાગ, રુદ્રયાગ, દેવીયાગ, વિષ્ણુયાગ, ગાયત્રીયાગ, દત્તયાગ, સોમયાગ, ઈન્દ્રયાગ, વરુણયાગ, નવચંડી, શતચંડી, સહસ્ત્રચંડી, રુદ્રાભિષેક, લઘુરુદ્ર, મહારુદ્ર, રુદ્રસ્વાહાકાર, વાસ્તુશાંતિ તથા દેવ-દેવીઓ અને સદગુરુની પ્રતિમાની પ્રાણપ્રતિષ્ઠા તથા ધાર્મિક સમાજીક વાર્ષિક ઉત્સવોના પૂજન તેમજ વ્રત-ઉપવાસોના ઉદ્યાપનો કરવામાં આવે છે.

ગણેશ યાગ

કળિયુગમાં ગણેશજી સર્વશ્રેષ્ઠ દેવ કહેવાયા છે, અને તેથી તેઓ અનંત ફળના દાતા છે. દરેકે દરેક મુશ્કેલીમાં પડેલા અને દરેક કાર્યમાં વિઘ્નો આવતાં હોય તેવાં મનુષ્યોએ બધાં જ વિઘ્નોની નિવૃત્તિ માટે શ્રી ગણેશ યજ્ઞ કે શ્રી ગણેશ મહાયાગ કરવો જોઈએ, એથી એની ફળશ્રુતિ તરીકે ભગવાન ગણેશજી આ લોકમાં ધનધાન્ય આદિથી પૂર્ણ તો કરે છે જ પણ આ શરીર છૂટ્યા પછી પોતાના ભક્તોને પરમ પાવન દિવ્ય ધામ પ્રદાન કરે છે.

સૂર્ય યાગ

સૂર્ય યાગ મનુષ્યના બધા રોગોને મટાડે છે. બધી મનોવાંચ્છિત ઈચ્છાઓને પૂર્ણ કરે છે. સૂર્ય યજ્ઞના અનુષ્ઠાનથી કુષ્ઠ રોગ, ટીબી, ક્ષય આદિ મહારોગોની શાંતિ થાય છે. દાદ, ખાજ, ખુજલી, ફોડે, ફુણસી જેવા, માથાના બધા જ રોગો, આંખ-કાન-નાક-ગળ, નાનું-મોટું મગજ બ્રેઈન ટ્યુમર, બ્રેઈન હેમરેજ, ટોન્સીલ, થાઈરોઈડ, વા નો રોગ વગેરે દૂર થવામાં સહાયતા મળે છે. સૂર્યયાગના અનુષ્ઠાન કે પુરશ્ચરણથી જ્વર, શૂલ તથા ક્ષય નષ્ટ થવામાં તથા હાર્ટ અને હાડકાના રોગો જેવા અનેક રોગોમાં રાહત મળે, એમાં કોઈ શંકા નથી.

નવ ગ્રહ યજ્ઞ

આ સંપૂર્ણ સચરાચર ત્રૈલોક્ય એ ગ્રહોથી વ્યાપ્ત છે. અને તેથી જ જો નવગ્રહ દેવતા સંતુષ્ટ અને પ્રસન્ન થાય તો તેઓ રાજ્ય વૈભવ, સુખ-શાંતિ-સમૃદ્ધિ-યશ-પ્રતિષ્ઠા- સત્તા, અધિકાર, સ્ત્રીપુરુષ કુટુંબ પરિવાર ગાડી અને લાડી બધું જ પ્રદાન કરે છે. અને જો નવ ગ્રહ દેવતા નારાજ થયા તો ઉપરોક્ત બધું જ સુખવૈભવ છીનવી પણ લે છે. માટે નવગ્રહ યજ્ઞ કરવો જોઈએ. યજ્ઞ દ્વારા પ્રસન્ન થયેલા દેવો તનમાં-મનમાં અને ઘરમાં શાંતિ પ્રદાન કરે છે. એમની પ્રસન્નતાથી મનુષ્ય શરીરમાં, વાહનોમાં, ઘરમાં બધે જ સુખશાંતિ વિરાજે છે. મનુષ્ય અને એનાથી નિમ્ન કોટિના બધા જ જીવો ગ્રહાધીન છે. સૃષ્ટિનું પાલન કે સંહાર પણ ગ્રહોને લીધે છે. ગ્રહાત્મ લક્ષહોમથી મનુષ્યની સમસ્ત કામનાઓ પૂર્ણ થાય છે અને તે આઠસો કલ્પ સુધી વસુ, આદિત્ય, મરુદ ગણ વગેરે દ્વારા શિવલોકમાં પૂજાયેલો થાય છે. ત્યાર પછી તે મોક્ષપદ પ્રાપ્ત કરે છે. (અગ્નિપુરાણ)

જેમને ધનની ઈચ્છા છે અથવા જે પોતાની જન્મકુંડલીમાં રહેલા અશુભગ્રહ, પાપ અને ક્રૂર ગ્રહો, મારક ગ્રહ, બાધક ગ્રહ અને હાનિકારક રોગ-શત્રુ-દેવું કરાવનારા ગ્રહો, આધિ-વ્યાધિ-ઉપાધિ ઘાત-આઘાત-વિશ્વાસઘાત, અપમૃત્યુ, અકસ્માત, ઓપરેશન કરાવનારા ગ્રહો અને પોલીસકેસ, કોર્ટકેસ નાણાંનો દૂર્વ્યય અને બંધનમાં લાવનાર ગ્રહોની પીડાથી મુક્ત થવા માંગતા હોય તેમણે આ યજ્ઞ કરવો જોઈએ. વરસાદ, આયુષ્ય, આરોગ્યની પ્રાપ્તિ માટે, બાળક જન્મીને મરી જતા હોય તેવી સ્ત્રી માટે, સત્તા પરથી પદચ્યુત થયેલા હોય તેણે પુનઃ સત્તાની પ્રાપ્તિ માટે, જેમને મહા અને દીર્ઘ રોગો થયા હોય અને સુદૃઢ આરોગ્ય ઈચ્છતા હોય, તેમણે નવગ્રહ યજ્ઞ કરવો જોઈએ. પ્રસન્ન થયેલ નવ ગ્રહો આયુષ્ય, વિદ્યા, અને સુખ ઉપરાંત ધર્મ-અર્થ-કામ પ્રદાન કરે છે. શત્રુઓનો નાશ તથા રાજાઓમાં સન્માન આપે છે. (શાંતિ ચિંતામણી)

કોટી હોમ - મહાયજ્ઞ

કોટી યજ્ઞ આયુષ્યની વૃદ્ધિ, ગ્રહ વગેરેની શાંતિ માટે સર્વ પ્રકારના અનિષ્ટો અને રાજામહારાજાઓના મહાન ઉત્પાતોને વિનિષ્ટ કરવાવાળો કોટી યજ્ઞ છે, એટલે પોતાની શક્તિ ને સામર્થ્ય પ્રમાણે પુષ્ટિની વૃદ્ધિ કરવાવાળો કોટી હોમ, લક્ષ હોમ અતવા અયુત હોમ દર વર્ષે કરવો જોઈએ. આ યજ્ઞથી ધનના અભિલાષીને ધન, પુત્રની કામનાવાળાને પુત્ર, તદનુસાર આદર્શ સુંદર પતિ કે પત્નિ, રાજાને રાજ્યસત્તા, લક્ષ્મીના કામનાવાળાને ધન પ્રાપ્ત થાય છે. સકામ યજ્ઞ કરનારની યથેચ્છા કામનાઓ સંપૂર્ણ થાય છે પરંતુ જે નિષ્કામ ભાવે કોટી હોમ કરે છે તેમને તો પરબ્રહ્મની પ્રાપ્તિ થાય છે. વળી ગ્રહોની પીડા અને બંધુજનોનો ક્ષય થતો નથી. જે ઘરમાં યજ્ઞનારાયણ હોય છે તે ઘરમાં રોગ, પીડા, શોક, સંતાપ, દરિદ્રતા ક્લેશ નથી હોતા. સમસ્ત પ્રકારના બંધન અને પાપ રાશિઓના સમુહનો નાશ કરે છે. ભોગ અને મોક્ષ બંને પ્રદાન કરે છે. રાજ્ય કે રાષ્ટ્રની અભિવૃદ્ધિ કરે છે. ભવિષ્યમાં તેમના રાજ્યમાં આવનારા ઉત્પાતો, ભૂકંપો, અતિ ને અનાવૃષ્ટિ રૂપી અનેક ચિંતાઓ અને સમસ્ત ભયમાંથી મુક્ત કરે છે. જે બધા અરિષ્ટોને દૂર કરનાર આ કોટી હોમ કરે છે તેની બધી ઈચ્છા પૂર્ણ થાય છે અને અંતે શુદ્ધ અંતઃકરણવાળો થઈને ઈન્દ્રલોકને પ્રાપ્ત કરે છે.

શ્રી રામયજ્ઞ

શ્રી રામચંદ્રનો યજ્ઞ બધા સાધકોનો સાધક છે અર્થાત્ ઉપાય છે. એનાથી ધર્મ-અર્થ-કામ અને મોક્ષની પ્રાપ્તિ થાય છે અને શારીરિક, માનસિક સંતુષ્ટિ અને પુષ્ટિ મળે છે. આ યજ્ઞ મહાસિદ્ધઓ આપનારો પુણ્યપ્રદ, કામનારૂપ ફળ આપનારો છે. તરત જ બધા પ્રકારના અરિષ્ટોને હરનારા અને ઉપદ્રવોનો નાશ કરનારો, માનસિક વ્યથા ને શારીરિક વ્યાધિ હરનારો છે તથા મનોવાંચ્છિત સિદ્ધ કરવામાં સર્વશ્રેષ્ઠ છે. તે પુત્રપૌત્રાદિ સુખ આપનારો અને બલવીર્યની અભિવૃદ્ધિ કરનારો છે. આ રામયજ્ઞ રાજ્યભ્રષ્ટ રાજાને રાજ્ય, નિર્ધનને ધન આપનારો, અકાળ કાળમાં વૃષ્ટિ કરનારો, મોટા ઉત્પાતોના નિવારણ કરનારો છે. જે પણ કોઈ મુમુક્ષુ હોય તેને મોક્ષ આપનારો, ગતિવિહીન ને ગતિ દેનારો અને દિશા-ધ્યેય-લક્ષ્યવિહીનને ધ્યેય આપનારો છે. મોટા મોટા સંકટના સમયમાં અતિ સંતપ્ત ચિત્તદશા વાળાને સુખ શાંતિ નિર્ભયતા આપનાર છે. ત્રણેય લોકમાં રામયજ્ઞ સમાન ગતિ, રામયજ્ઞ જેવું કર્મ નથી. રામયજ્ઞ જેવું પુણ્યફળ નથી. સંસારરૂપી વ્યાધિથી દુઃખી તમે બધી જ યાત્રાઓ કર્યા વગર પ્રયત્નપૂર્વક બધા કઠિન વ્રતો તપો સહન કર્યા વિના શાસ્ત્રો ને વેદોના અધ્યયન વિના પણ મનગમતી સિદ્ધિઓ મેળવવા બાહ્યાભ્યંતર શત્રુઓના વનાશ માટે રામયજ્ઞનનો આશ્રય લઈને નિઃસંશય રીતે કાર્ય સિદ્ધ કરી શકાય છે. બધા કર્મોમાં યજ્ઞકર્મ ઉત્તમ છે. યજ્ઞોમાં રામફલનું ફળ ઉત્તમ છે, સર્વાધિક છે. એનાથી મોટો કોઈ યજ્ઞ નથી. न हि रामात्परो मरवः। (પદમપુરાણ પાતાલખંડ-३५।४घ)

ગાયત્રી યજ્ઞ

ગાયત્રી મંત્રના જાપ, હોમ, અનુષ્ઠાન, પુરશ્ચરણથી અથવા ગાયત્રી યજ્ઞના હવનથી ગ્રહો જો નિર્બળ, અસ્તના, વક્રી કે ઘાતક, મારક, બાધક હોય, ગોચર ગ્રહો પ્રતિકૂળ હોય તો તે અનુકૂળ થાય છે. ગાયત્રી સાધના કરનાર સાધકની ઉપર બધા જ ગ્રહો, દેવી દેવતાઓ, ઋષિઓ, સંતો પ્રસન્ન થઈને સુખ, શાંતિ, પ્રેમ, આશીર્વાદ વરસાવે છે.

મહામૃત્યુંજય યજ્ઞ

મહા મૃત્યુંજય યજ્ઞ કરવાથી સમસ્ત ગ્રહજનિત પીડાઓ, મહારોગો, અસાધ્ય ને દીર્ઘકાળપર્યંત ચાલનારા રોગો દૂર થાય છે. ભાઈ-બંધુઓના વિયોગ દૂર કરવા, મહામારી રોગોમાંથી મુક્ત થવા, રાજ્યભંગ, ધનહાનિ, અપમૃત્યુના યોગ, ધર્મનો નાશ થતો અટકાવવા, જનક્લેશ થતો અટકાવવા માટે મહામૃત્યુંજય યજ્ઞ કરવો. આ યજ્ઞ થકી સુદૃઢ આરોગ્ય અને દીર્ઘ આયુષ્યની પ્રાપ્તિ થાય છે.

શતચંડી અને સહસ્ત્રચંડી યજ્ઞ

જ્યારે જીવનમાં મહાસંકટ ઉત્પન્ન થાય, અસાધ્ય રોગમાં, જાતિભ્રષ્ટતામાં, કૂળ કે વંશ નાશ થવાની તૈયારીમાં હોય, ચારે બાજુથી શત્રુઓ વધતાં જતા હોય કે શત્રુઓથી ઘેરાયેલા હોય, ટીબી, કેન્સર, હાર્ટએટેક, કોમા, મગજની બિમારી, કીડની લિવર જઠરના રોગ હોય, વિભિન્ન પ્રકારના ઉત્પાતમાં અને નાના કે મોટા જાહેર કે ગુપ્ત પાપકર્મોમાં પ્રયત્નપૂર્વક માતાજીનો શતચંડી (ચંડીપાઠના ૧૦૦ પાઠ) કે સહસ્ત્રચંડી (ચંડીપાઠના ૧૦૦૦ પાઠ) યજ્ઞ કરવો જોઈએ. શતચંડી કે સહસ્ત્રચંડી યજ્ઞને કરાવવાથી પરમ આત્મકલ્યાણ અને બાહ્ય અને અભ્યંતર રાજ્યની વૃદ્ધિ અને સુખાકારી, પરમશાંતિ, પરમ આનંદ પ્રાપ્ત થાય છે. શતચંડી યજ્ઞ કરાવવાથી મનના મનોરથો, આકાંક્ષા અને અભિલાષાઓ પૂર્ણ થાય છે. દુર્ગાના રૂપમાં સ્વયં લક્ષ્મીજી પોતે આવીને સ્થિરરૂપમાં નિવાસ કરે છે. જેમની કૃપાથી માનવ સમસ્ત મનોરથો, કામનાઓને ભોગવીને મુક્તિને પ્રાપ્ત કરે છે. સમસ્ત સિદ્ધિઓ સિદ્ધ થઈ જાય છે. (વારાહી તંત્ર)

રુદ્રાષ્ટક અને લઘુ રુદ્રી

બ્રાહ્મણો તેમજ શિવઉપાસકો માટેનો શિવને પ્રસન્ન કરવા માટેનો ઉત્તમ પાઠ એટલે રુદ્રી. રુદ્રાભિષેકમાં વૈદિક મંત્રોના શ્રવણ અને મંદિર ની ઊર્જાથી સાધક તન્મય થઈ જતો હોઈ સાધકમાં શિવ તત્વ નો ઉદય થાય છે. રુદ્રી વિશે કહેવાય છે કે 'રુત દ્રાવ્યતિ ઈતિ રુદ્ર' એટલે કે તે રુત એટલે કે દુઃખ અને દુઃખનું કારણ તેને જે દૂર કરે છે , તે રુદ્ર છે .અને આવા શિવના રુદ્ર સ્વરૂપને પ્રસન્ન કરવા માટેની સ્તુતિ એ રુદ્રી.

વેદોમાં રુદ્રી અંગે ના જે મંત્રો છે, તેને શુક્લ યજુર્વેદીય, કૃષ્ણ યજુર્વેદીય, રુગ્વેદીય મંત્રો કહે છે. સૌરાષ્ટ્ર - ગુજરાત માં શુક્લ યજુર્વેદીય રુદ્ર મંત્રો વધારે પ્રચલિત છે. રૂદ્રની આ સ્તુતિ - રુદ્રીમાં મુખ્ય આઠ અધ્યાય હોવાથી તેને અષ્ટાધ્યાયી કહે છે. આ સ્તુતિમાં રુદ્રની જે મુખ્ય આઠ મૂર્તિઓ છે પૃથ્વી, જલ, તેજ, વાયુ, આકાશ, ચંદ્ર, સૂર્ય અને આત્મા. તેના સ્વરૂપોનું વર્ણન છે . સ્થૂળ રીતે પ્રથમ અધ્યાયમાં ગણપતિની સ્તુતિ, બીજામાં ભગવાન વિષ્ણુની સ્તુતિ, ત્રીજામાં ઈન્દ્રની સ્તુતિ, ચોથામાં સૂર્યદેવની સ્તુતિ અને પાંચમો અધ્યાય જે હાર્દ મનાય છે તેમાં રુદ્ર ની સ્તુતિ છે. છઠ્ઠા અધ્યાયમાં મૃત્યુંજયની સ્તુતિ, સાતમા અધ્યાયમાં મરૂત દેવતાની સ્તુતિ અને આઠમા અધ્યાયમાં અગ્નિ દેવતાની સ્તુતિ છે. શિવલિંગ પર અભિષેક કરતા આ આઠે - આઠ અધ્યાય બોલી શકાય છે પાંચમો અધ્યાય કે જે આ સ્તુતિનો મુખ્ય ભાગ છે, તેમાં ૬૬ મંત્ર છે . એકથી ચાર અધ્યાય ત્યારબાદ પાંચમા અધ્યાયનું અગિયાર વખત આવર્તન અને ત્યારબાદ છ થી આઠ અધ્યાયના પઠનથી એક રુદ્રી થઈ ગણાય.

મરણોપરાંત શ્રાદ્ધ ક્રિયાઓ

જે પણ તિથિએ જે વ્યક્તિનું મૃત્યુ થયુ હોય એ તિથિના દિવસે સંબંધિત વ્યક્તિનું શ્રાદ્ધ કરવામાં આવે છે. હિન્દુ ધર્મમાં માન્યતા છે કે શરીર નાશ પામ્યા પછી પણ આત્મા અજર-અમર રહે છે. તે પોતાના કાર્યોના ભોગ ભોગવવા માટે નાની યોનિયોમાં વિચરણ કરે છે. પુણ્યનુ ફળ સ્વર્ગ અને પાપનુ ફળ નર્ક હોય છે. નર્કમાં જીવાત્માને ખૂબ યાતનાઓ ભોગવવી પડે છે. પુણ્યાત્મા મનુષ્ય યોનિ અને દેવયોનિને પ્રાપ્ત કરે છે. આ યોનિયો વચ્ચે એક યોનિ હોય છે એ છે પ્રેત યોનિ. પિતૃ યોનિ પ્રેત યોનિથી ઉપર છે અને પિતૃલોકમાં રહે છે.

ભાદ્રપદની પૂર્ણિમાથી અશ્વિન કૃષ્ણ અમાસ સુધી સોળ દિવસ સુધીનો સમય સોળ શ્રાદ્ધકે શ્રાદ્ધ પક્ષ કહેવાય છે. શાસ્ત્રોમાં દેવકાર્યોથી પૂર્વ પિતૃ કાર્ય કરવાની સલાહ આપવામાં આવી છે. શ્રાદ્ધમાં ફક્ત પિતૃ જ નહી પરંતુ સમસ્ત દેવોથી લઈને વનસ્પતિઓ પણ તૃપ્ત થાય છે. શ્રાદ્ધ કરનારનુ સાંસારિક જીવન સુખમય બને છે અને મોક્ષની પ્રાપ્તિ થાય છે. એવી માન્યતા છે કે શ્રાદ્ધ ન કરવાથી પિતૃક્ષુધાથી ત્રસ્ત થઈને પોતાના સગા સંબંધિઓને કષ્ટ અને શાપ આપે છે. પોતાના કર્મો મુજબ જીવ જુદી જુદી યોનિયોમાં ભોગ ભોગવે છે. જ્યા મંત્રો દ્વારા સંકલ્પિત હવ્ય-કવ્યને પિતર પ્રાપ્ત કરી લે છે.

પિતૃ દોષ (નારાયણ બલી)

નારાયણ બલી વિધિ મૃત્યુ પામેલ વ્યક્તિ દ્વારા જયારે કોઈ વ્યક્તિને શારીરિક દર્દ અથવા તો કોઈક બીજી ઉપાધી હોય ત્યારે કોઈ પિતૃ તરફથી આ ઉપાધી છે એવું જાણવામાં આવે તો પિતૃઓને ઉદ્દેશીને નારાયણ બલી કરાય છે.આ નારાયણ બલી શ્રાદ્ધ ચાણોદ,સિદ્ધપુર કે તાપીતટ જેવા પવિત્ર તીર્થક્ષેત્રમાં જ કરવામાં આવે છે.આ નારાયણ બલી દ્વારા પિતૃ દોષ ની નિવૃત્તિ સાથે પિતૃઓ ની શાંતિ કરી તેમની કૃપા મેળવવા માટે જ કરવામાં આવે છે.જો કોઈ સબંધી નું આપણી જાણ બહાર મૃત્યુ થયું હોય અને ઘણો સમય વીતી જવા છતાં પણ તેની ક્રિયા કરવાની રહી ગઈ હોય તો પહેલા નારાયણ બલી કર્મ કરી શેષ ક્રિયા કરાવી જોઈએ.આ નારાયણ બલી કરવાની વિધિમાં અગિયારમાની નારાયણ બલી કરતા થોડો વધારો અને ફેરફાર પણ હોય છે.

કાલસર્પ દોષ નિવારણ

એક એવો યોગ છે જે જાતકના પૂર્વ જન્મના કોઈ અપરાધ કે દંડ કે શ્રાપના ફળસ્વરૂપ તેની જન્મકુંડળીમાં જોવા મળે છે. જ્યારે કુંડળીમાં સાત ગ્રહ રાહુ અને કેતુ વચ્ચે હોય તો તે ઘાતક કાલસર્પ યોગ બને છે. તેમા વ્યક્તિ આર્થિક અને શારીરિક રૂપે પરેશાન તો થાય છે સાથે જ સંતાન સંબંધી કષ્ટ પણ રહે છે. તેને હંમેશા આર્થિક સંકટ ઘેરી લે છે. તેને અનેક પ્રકારના રોગ સતાવતા રહે છે. બનતા કામ બગડી જાય છે કે પછી તેમા અવરોધ ઉભો થાય છે. આવી વ્યક્તિના જીવનમાં ઉતાર ચઢાવ જોવા મળે છે.

જો કાલસર્પ યોગનો પ્રભાવ કોઈ જાતક માટે અનિષ્ટકારી હોય તો તેણે જીવનમાં સફળતા માટે આનો ઉપાય જરૂર કરવો જોઈએ. કાલ સર્પ યોગના ઉપાય માટે શ્રાવણનો મહિનો ખૂબ જ મહત્વનો માનવામાં આવે છે. શ્રાવણ મહિનાના શુક્લ પક્ષની નાગ પૂજાનો દિવસ અર્થાત નાગપંચમીના દિવસે કાલસર્પ દોષ શાંતિ માટે નાગ અને શિવની વિશેષ પૂજા અને ઉપાસનાથી જીવનમાં આવી રહેલ અવરોધો નિશ્ચિત રૂપે દૂર થાય છે. કાળ સર્પ યોગથી પીડિત જાતકને યથાસંભવ આ સ્થાન પર જઈને દર્શન પૂજા અર્ચના કરવી જોઈએ.