શ્રી વિજયભાઈ પુરોહિત, જેમને અધિકતર લોકો પંડિતજીના નામે ઓળખે છે, એક બહુવિધ આયામ ધરાવતું વ્યક્તિત્વ છે. જ્યોતિષ, કર્મકાંડ, વાસ્તુ કે જન્માક્ષરના ક્ષેત્રમાં એમનું નામ આદરથી લેવાય છે. ખાનદાની સંસ્કારી અને અધ્યાત્મિક કુટુંબમાં પંડિતજીનો જન્મ થયો છે. તેઓ પાંચ ભાઈ-બેનોના પરિવારમાં ચોથું સંતાન છે. પંડિતજીના પિતાજી જયેન્દ્રભાઈ શાળામાં પ્રિન્સિપાલ હતા. તેમના માતુશ્રી મા જગદંબાના અનન્ય ભક્ત હતા.

શાળાના દિવસોથી જ પંડિતજીને જ્યોતિષ શાસ્ત્રમાં રસ હતો. તેઓ એમની કિશોરાવસ્થામાં સંતોના સાન્નિધ્યમાં રહેતા હતા. શાળાકીય અભ્યાસક્રમ પછી તેમણે એમની રુચિને સંતોષવા જ્યોતિષ શાસ્ત્રનો ગહન અભ્યાસ કરવાનું નક્કી કર્યું. તેના પરિણામે તેમણે ૧૯૮૫માં જ્યોતિષ વિશારદ, ૧૯૮૮માં જ્યોતિષ શાસ્ત્રી અને ૧૯૯૦ માં જ્યોતિષ આચાર્યની પદવી પ્રાપ્ત કરી. ઉલ્લેખનીય છે કે તેમને અભ્યાસકીય ઉપલબ્ધિ માટે મહારાજા સયાજીરાવ યુનિવર્સિટી તરફથી બે વાર સુવર્ણચંદ્રક પણ પ્રાપ્ત થયો. આ ઉપરાંત તેમણે કાશીની સંપૂર્ણાનંદ વિશ્વ વિદ્યાલય ખાતેથી જ્યોતિષનો અભ્યાસક્રમ પૂર્ણ કર્યો તથા ગુજરાત સરકારના જ્યોતિષ વિભાગ તરફથી લેવામાં આવતી શ્રાવણ માસ દક્ષિણા પરીક્ષા પણ પાસ કરી. અભ્યાસ સંપૂર્ણ કર્યા બાદ તેમણે મહારાજા સયાજીરાવ યુનિવર્સિટી દ્વારા સંચાલિત સંસ્કૃત મહાવિદ્યાલયમાં પાંચ વરસ સુધી પ્રાધ્યાપક તરીકે સેવા આપી, જે દરમ્યાન તેમણે છાત્રોનો અનહદ પ્રેમ અને આદર પ્રાપ્ત કર્યો.

ઈ.સ. ૧૯૯૦માં પંડિતજીએ પોતાના બહોળા અનુભવજ્ઞાનનો લાભ જનસમાજને મળે એ હેતુથી મા સર્વેશ્વરી જ્યોતિષ કાર્યાલયની સ્થાપના કરી. કોમ્પ્યુટર થકી આધુનિક વિજ્ઞાનની ગણતરીની ચોકસાઈ અને જ્યોતિષ શાસ્ત્રના પૌરાણિક જ્ઞાનનો સંગમ કરીને તેમણે જન્માક્ષર બનાવવાનો તથા જ્યોતિષ, વાસ્તુ અને અધ્યાત્મનો સંગમ કરી માર્ગદર્શન આપવાનો પ્રારંભ કર્યો. આજે દેશવિદેશમાં એમનો બહોળો પ્રસંશક વર્ગ છે. શુદ્ધ સંસ્કૃત ઉચ્ચારો, વિધિ કરતી વખતે યજમાનને તથા અન્ય ઉપસ્થિત શ્રોતાઓને અર્થ સમજાવવાનો સંનિષ્ઠ પ્રયાસ, તથા ભાવપૂર્વક કરવામાં આવતી વિધિને કારણે એમના યજમાનો શુભાશુભ પૂજનવિધિઓ માટે એમનો જ આગ્રહ રાખે છે.

પંડિતજીના સંપર્કમાં આવનારા ઘણાં એમની આધ્યાત્મિક ઊંચાઈથી અણજાણ છે. હકીકતમાં પંડિતજી એક સારા જ્યોતિષી, કર્મકાંડી હોવાની સાથે સાથે આધ્યાત્મિક માર્ગે આગળ વધેલા મહાપુરુષ છે. એમણે ભારતના વિવિધ તીર્થક્ષેત્રો અને સાધનાના હેતુથી ઋષિમુનિસેવિત હિમાલયના પુણ્યપ્રદેશનો અવારનવાર પ્રવાસ કરેલો છે. તેઓ અનેક જાણીતા અને ઓછા જાણીતા સંતો અને સિદ્ધોને મળી ચુક્યા છે. એમને ધ્યાન, જાગ્રત કે સ્વપ્નાવસ્થામાં અનેકવાર મહાપુરુષો અને ઈશ્વરના વિવિધ સ્વરૂપોનું દર્શન થયેલું છે. જોકે તેઓ પોતાની આધ્યાત્મિક પ્રગતિનો બધો શ્રેય એમના સદગુરુ પૂજ્ય શ્રી યોગેશ્વરજી અને પૂજ્ય મા સર્વેશ્વરીને આપે છે.

પંડીતજીનું મોહક સ્મિત અને એમના મુખમંડળની આભા કોઈને પણ આકર્ષિત કરે એવી છે. એમની સાથે થોડો સમય ગુજારવો એ જીવનનો અવિસ્મરણીય લ્હાવો છે.